BUTUAN CITY – Gipadayag sa mga eksperto nga posibleng tungod sa nabungkag nga ubos nga bahin sa usa ka glacier ug nahugno ngadto sa giladmong 800-metros ang hinungdan sa makamatay nga flash flood sa Nepal duol sa utlanan sa Tibet kagahapon.
Nakita kini sa satellite images sa Planet Labs apan wala pa’y klaro kung unsa’y hinungdan sa pagkahugno sa glacier, apan gi-isip sa mga opisyal sa Nepal nga posible nga adunay kalabotan ang linog nga nahitabo pipila ka minuto adiser ang insidente.
Nahimutang sa Rasuwa District ang pinakagrabeng naapektuhan nga lugar, diin adunay daghang mga hydropower projects.
Sigon sa Nepal’s National Disaster Risk Reduction and Management Authority, ang gitawag nilang “glacier-inclusive flood” nahitabo sa Lhende River human sa landslide nga mga 20 kilometros sa amihanan-sidlakan sa Nepal-China border crossing.
Gibutyag usab ni geologist Prakash Pokharel nga ang flash flood resulta sa ice-rock avalanche sa bahin sa Nepal, apan padayon pa ang imbestigasyon kung ang linog ba gyud ang hinungdan niini.
Ang baha nagpadala og kusog nga bul-og sa tubig, lapok, bato ug dagkong tipak sa yuta ngadto sa Bhote Koshi ug Trishuli river systems. Sa Galchhi area nga naa sa ubos nga bahin sa suba, gikataho nga misaka og hangtod 9 metros o mga 30 ka piyes ang lebel sa tubig sulod lang sa 30 minutos.
Sigon sa International Centre for Integrated Mountain Development, nagkadaghan ug nagkakusog ang mga baha, landslide, avalanche ug hulaw sa Hindu Kush Himalayas, nga naghatag og dakong hulga sa mga komunidad nga nagpuyo sa maong rehiyon.
