BUTUAN CITY- Usa na usab ka tulay sa Tarlac City ang nahugno sulod lang sa usa ka adlaw tungod sa padayong kusog nga pag-ulan nga dala sa Habagat.
Ang Agana Bridge sa Barangay Tibag nahugno pasado alas-8:32 sa gabii kagahapon Sabado, Agosto 29, human madaot tungod sa walay hunong nga ulan ug kusog nga awas sa Tarlac River.
Base sa taho usa ka Toyota Avanza nga adunay lima ka sakay nahulog sa suba sa dihang nahugno ang maong tulay diin usa sa mga pasahero ang gi-ingong naluwas samtang padayon pa nga gipangita ang nabiling upat ka indibidwal.
Nahitabo kini usa ka adlaw human usab nahugno ang bahin sa Aquino Bridge sa maong siyudad, nga gilimitahan gilayon ang pag-agi sa mga sakyanan.
Gipahimangnoan usab sa mga awtoridad ang mga motorista nga dili mosulay pagtabok sa Agana Bridge ug mogamit og alternatibong mga ruta samtang nagpadayon ang rescue operation ug imbestigasyon sa hinungdan ug gidak-on sa kadaot.
