BUTUAN CITY – Gipa-abot na ni Butuan City lone district Rep Jose “Joboy” Aquino II, Vice Chairperson sa House Committee on Appropriations, ang iyang kabalaka bahin sa nagkagrabeng problema sa suplay sa tubig sa Butuan City.
Atol kini sa deliberasyon sa House Committee on Appropriations sa Fiscal Year 2027 budget sa Department of Environment and Natural Resources (DENR).
Opisyal nga gipa-abot on record ni Aquino ang maong concern aron ma-aksyunan tungod kay human sa pakigkita sa mga kanhi ug kasamtangang opisyales sa siyudad uban sa Butuan City Water District kon BCWD ngadto kang Local Water Utilities Administration (LWUA) Administrator Jose Moises Salonga niadtong Hunyo 8 ning tuiga, hangtud karon wala pa’y aksyon ang water district.
Inisyal matud pang nasabutan nga human sa 45-diyas gikan sa ilang panagtagbo, magsubmite og mga dokumento ang general manager sa BCWD kansa langay na kaayo alang sa naghulat nga mga Butuanong konsumidor.
Importante kini nga isyu alang sa siyudad tungod kay nasinati na kaniadto sa Butuan ang grabe nga kakulang sa tubig, diin ang dugay nga dry spell naka-apekto sa Taguibo watershed, nga maoy nag-unang tinubdan sa tubig sa siyudad.
Gipakita ni Aquino nga kinahanglan hatagan og seryosong pagtagad sa gobyerno ang sustainable nga pagdumala ug pagpanalipod sa water sources aron malikayan nga mausab o mograbe pa ang krisis sa tubig sa Butuan.
Ang iyang paghisgot niini atol sa budget deliberations nagpasabot nga gusto niyang masiguro nga adunay igo nga pondo ug kongkretong programa ang DENR alang sa pagpreserbar sa mga watershed ug pagsulbad sa dugay nang problema sa suplay sa tubig ilabina nga ting-ulan na sa Oktubre ug maglisod na usab og construct sa gikinahanglang pasilidad.
