BUTUAN CITY- Gipakusgan sa Quezon City Health Department o QCHD ang disease surveillance sa 42 ka evacuation center sa 21 ka barangay aron mapugngan ang pagkaylap sa mga sakit ug mapanalipdan ang kahimsog sa mga residenteng mingbakwit tungod sa pagbaha nga dala sa habagat.
Sumala sa Quezon City Government, mokabat sa 2,326 ka pamilya o 8,209 ka indibidwal ang anaa sa mga evacuation center alas-9 sa buntag niadtong Martes. Kauban sa mga doktor ang Disease Surveillance Officers nga nagpatuman sa Surveillance in Post-Extreme Emergencies and Disasters o SPEED aron mamonitor ang mga sintomas sa leptospirosis, dengue, trangkaso, water-borne diseases ug uban pang balatian.
Samtang, naglibot usab ang community health workers sa mga komunidad aron mang-apod-apod og post-exposure prophylaxis batok sa leptospirosis ug mangita sa mga residenteng adunay posibleng sintomas sa maong sakit ug dengue.
Gikan Enero 1 hangtod Agosto 6, nakarekord ang siyudad og 139 ka kaso sa leptospirosis, lakip ang 18 ka kamatayon.
Padayon usab nga nagpahimangno ang lokal nga panggamhanan sa mga residente nga nakalabang o nalusong sa baha nga magpa-checkup dayon sa pinakaduol nga health center, ilabina kung makasinati og hilanat, kasakit sa lawas, pagpula sa mga mata o uban pang sintomas, tungod ang leptospirosis mahimong mokatap pinaagi sa tubig-baha nga nahugawan sa ihi sa mga ilaga nga adunay impeksyon.
