BUTUAN CITY– Gibantayan karun sa Office of the Civil Defense kon OCD ang uban pang landslide prone area sa Baguio City ug ubang parte sa Cordillera Administrative Region tungod sa walay hunong nga pag-uwan.
Sumala ni Albert Mogol, Regional Director sa OCD Cordillera Administrative Region, ubay-ubay nga indibidwal na ang kompirmadong patay tungod sa mga serye sa landslide nga nagsugod pa niadtong Agosto 6 kung asa 2 ang namatay ug 2 ang na-angol sa usa ka kan-anan nga sakop sa nahugnong area.
Gisundan kini og bag-ong landslide niadtong Agosto 9 kung asa 3 ka panimalay ang natabunan og 13 ka indibidwal ang anaa sa maong area, samtang 3 palang ang kompirmadong buhi sa maong ihap samtang 6 ang missing kagahapon sa hapon. Usa usab ka 2-anyos nga bata ang nakit-an sa mga rescuers kagahapon apan wala na kini kinabuhi.
Sigon pa ni Director Mogol, padayon gihapon ang pag-uwan sa Cordillera hilabi na sa Baguio City. Dili na usab matud pa makagamit ang mga rescuers og mga heavy equipments tungod sa kabalaka nga mas mograbe ang sitwasyon sa maong lugar ug maday ang mga kasikbit nga mga panimalay tungod na usab sa mga serye sa landslide sa residential area.
Sa kasamtangan minggamit nalang matud pa ang mga rescuers og water pump aron kuhaon ang mga lapok ug uban pang mga debri nga nahagsa sa mga panimalay.
Dugang pa sa Director, wala gilaoman sa mga otoridad nga mo-abot sa dakong bulto sa tubig ang mingtagak-tak sa Baguio City ug sa uban pang parte sa Benguet kung asa niadtong Agosto 8 palang nangatagak na ang kapin 300 millimeters nga tubig. Bisan paman nga minghinay na ang mga serye sa pag-uwan, ming-abot pa gihapon kini og 100 hangtud 200 millimeters ug padayon nga nakahatag og kabalaka sa publiko kalabot sa mga posibilidad nga bag-ong serye sa Landslide.
