BUTUAN CITY- Gipahamtang ni U.S. President Donald Trump ang bag-ong kondisyon alang sa posibleng kasabutan sa kalinaw uban sa Iran, diin iyang gipangayo nga mobayad ang Tehran og kompensasyon sa mga kadaot ug kamatayon nga nalambigit sa mga gubat, pag-atake ug mga protesta sulod sa milabayng 50 ka tuig.
Ang maong pahayag ni Trump misunod sa mga kondisyon sa Iran nga lakip ang pagtapos sa mga silot ug bayad-pinsala, samtang nagpadayon ang paningkamot nga maabli pag-usab ang Strait of Hormuz, usa ka importanteng agianan sa kalibotanong suplay sa lana ug liquefied natural gas.
Sumala sa Iran, ming-uswag ang mga negosasyon uban sa Oman alang sa bag-ong shipping route, apan nagpabilin ang pipila ka teknikal nga isyu. Samtang nagkagrabe ang tensiyon tali sa Washington ug Tehran, misaka og lima ka porsyento ang presyo sa lana, tungod sa pagkunhod sa paglaum nga dali nang maabli pag-usab ang estratehikong agianan.
Si Trump, nga nag-atubang usab og pressure sa sulod sa Estados Unidos tungod sa taas nga presyo sa gasolina ug umalabot nga midterm elections, nagpadayon sa pagpangayo og dugang nga konsesyon gikan sa Iran isip bahin sa paningkamot nga tapuson ang gubat.
