BUTUAN CITY- Patay ang 13 ka tawo, lakip ang usa ka bata, samtang 75 ang nasamdan sa pag-atake gamit ang mga Ukrainian drone sa Nizhnekamsk, Tatarstan, Russia, sumala sa mga opisyal sa Russia.
Gikumpirma sa Armed Forces of Ukraine nga naigo sa maong pag-atake ang Tanevo oil refinery sa siyudad, samtang giangkon sa Ukrainian defense technology manufacturer nga FirePoint ang gigamit sa ilang FP-1 drones sa operasyon. Milungtad og pipila ka oras ang pag-atake gikan gabie hangtod sa buntag, ug nakit-an sa mga beripikadong hulagway ang dagkong aso ug kalayo nga misaka sa kalangitan samtang madungog ang mga sirena sa air raid.
Sigon sa Ukrainian officials, gipuntirya sa ilang mga pag-atake ang mga pasilidad nga ilang giingong nagsuplay og kita, armas ug logistical support sa gubat sa Russia batok sa Ukraine, samtang sigon sa Moscow nga lakip sa naigo ang mga lugar nga residensiyal.
Samtang ang Ukraine wala pa maghatag og opisyal nga komento bahin sa mga kaswalti, samtang ang Russia nagdeklarar og panahon sa pagbangutan sa Tatarstan human sa maong pag-atake. Dugang pa sa Moscow, kapin 450 ka Ukrainian drones ang ilang giingong gipusil sa air defenses sa tibuok Russia sulod sa usa ka gabii.
Ang maong pag-atake nahitabo samtang nagpadayon ang pagpalapad sa long-range drone strikes sa Ukraine batok sa mga pasilidad sa Russia, diin nagkadaghan usab ang mga kaswalti sa sibilyan.
