BUTUAN CITY – Hugot nga gibarugan ni Kagawad Ruben Canoy sa Brgy. Camayahan ning siyudad sa Butuan nga ang mga ginikanan ra sa 2-anyos nga si Ian Meñoza ang responsable sa iyang kamatayon.
Kini ang gipadayag sa kagawad sa eksklusibong pakighinabi sa Bombo Radyo Butuan human siya gisukna tungod sa pag-viral sa iyang conclusive statement human napalgang wala na’y kinabuhi ang bata, halos usa ka semana sukad kini na-missing.
Gibutyag ni Kagawad Canoy nga siya mismo ang nakasaksi nga wala’y kaguol ang magti-ayong Meñoza dihang iya kining gidalikyatan sa ilang pinuy-anan niadtong hapon sa Hulyo 23 human nsayran nga sa buntag pa sa maong adlaw gikatahong nawala ang bata.
Dako na lang ang iyang katingala tungod kay nag-inom na hinuon sa ilang pinuy-anan ang magti-ayon samtang duna’y nangabot nga mga tawo nga miboluntaryo pagpangita sa bata.
Iya pang gikatingala nga wala mi-apil pagsuhid sa kasagbutan ang magti-ayon og diha lang kini nagpundo sa ilang balay ug misamot pa ang iyang pagduda dihang sa iyang pagbalik paglabay sa pila ka adlaw, nanimaho gayod matud pa og patay ang ilang balay.
Kini ang gihimo niyang basehan nga gitaguan lang sa magti-ayon ang patay nang bata ug gilabog lang pagka-gabii dihang mingaw na ang ilang dapit.
Gipadayag pa sa konsehal nga andam siyang magpriso kung mapamatud-an nga dili ang mga ginikanan ang mipatay sa maong bata.
Aminado si Kagawad Canoy nga suod siya sa maong magti-ayon apan karon gibati niya ang kasuko tungod kay mas nanghingusog pa silang mga dili kabanay nga mapangita ang ilang anak samtang sila nag-inom lang matud pa.
Ang mas nakapasamot sa iyang kasuko tungod kay daw gibuang ra matud pa sila sa duha nga wala magpursige pagpangita sa bata sukwahi sa mga ginikanan nga nawad-an og anak nga dili sila ang sad-an, nga magkamatay na paghilak og pagpangayo og hustisya ilabina human nakit-an nga wala na kini kinabuhi.
