BUTUAN CITY- Patay ang labing menos siyam ka tawo ug 28 pa ang naangol human sa sunod-sunod nga pag-atake sa Russian ballistic missiles sa kaulohan sa Ukraine nga Kyiv niadtong Sabado sa buntag.
Sumala sa mga awtoridad, partially nga naguba ang mga residential building sa Shevchenkivskyi, Darnytskyi, ug Solomyanskyi districts, samtang ming-ulbo usab ang mga sunog ug naputol ang kuryente sa pipila ka lugar. Nahitabo ang pag-atake duha ka adlaw human sa laing lapad nga opensiba sa Russia diin adunay missile nga gituohang mitugpa sa Poland.
Tungod sa nagpadayon nga hulga, gisubli ni Ukrainian President Volodymyr Zelensky ang iyang panawagan alang sa dugang Patriot missile interceptors, samtang nagpadayon ang pakigpulong sa Estados Unidos bahin sa posible nga pagtugot sa Ukraine sa paghimo niini.
Samtang, sigon ni US President Donald Trump nga wala pa’y pinal nga kasabutan sa maong plano tungod sa kabalaka sa pagpaambit sa advanced military technology.
