BUTUAN CITY- Lima ka tawo ang namatay human mihapak ang kusog nga hangin sa mga rehiyon sa Rio de Janeiro ug São Paulo sa Brazil.
Sumala sa taho, nakahimo og grabe nga kadaot ang hangin nga adunay gikusgon nga mo-abot sa 100 kilometro matag oras, nga nakapahugno sa mga kahoy ug poste sa uryente.
Daghang kabalayan usab ang nawad-an og supply sa kuryente ug pila ka kalsada usab ang temporaryong gisira tungod sa mga nangatagak nga debris.
Gisupende usab ang operasyon sa pipila ka pampoblikong transportasyon samtang padayon ang clearing operations sa mga awtoridad.
Mipasidaan ang mga weather officer nga posibleng magpadayon pa ang daot nga panagon sa mga mosunod nga adlaw.
Padayon usab nga nanawagan ang lokal nga panggamhanan sa mga residente nga magpabilin sulod sa ilang mga panimalay alang sa kaluwasan.
