BUTUAN CITY – Patay nang napalgan sa canal sa usa ka banana plantation ang 2-anyos nga batang si Ian Meñoza, pila ka adlaw human kini gitaho sa inahan nga na-missing didto sa ilang pinamalay sa Purok 5, Brgy. Camayahan ning siyudad sa Butuan.
Napalgan kini sa tag-iya sa plantasyon nga si Jerome Pajal Dumdum sa kasagbutan ug bukirang parte sa iyang yuta sa Purok 1 sa susamang barangay nga anaa na sa state of decomposition.
Nasayrang pila ka adlaw nang gipangita ang biktima kinsa misaka matud pa sa ilang balay dihang nadunggan ang pagpa-sounds sa iyang inahan sa paboritong salida niini samtang nanilhig siya sa tugkaran.
Paglabay sa pila ka minutos, wala na kini sulod sa ilang balay hinungdan sa pila ka adlaw nilang pagpangita ug paghimo og mga kinaraang ritwal sa pangindahay nga ma-uli kini kanila kung gikuha matud pa sa mga dili ingon nato.
Gisaysay ni Jerome Dumdum, tag-iya sa yuta diin napalgan ang biktima, nanghimuso siya sa saging dihang nakasingo siya og hilabihan kabaho rasong iya kining gisubay.
Lisod matud pang makita ang patay’ng lawas sa bata tungod kay gitabunan kini og mga sanga-sanga rason nga ang nahimo niyang giya mao ang mga langaw nga nagtapok niini.
Dihang nakita niya ang bata, dali siyang mipa-uli ug gipahibalo kini sa iyang kabanay.
