BUTUAN CITY- Nagsang-at og ethics complaint ang grupo sa mga women’s rights advocates, academic ug feminists batok kang Senador Pia Cayetano sa Senate Ethics Committee kagahapon Miyerkules tungod sa giingong pag-post niini og spliced o giusab nga video ni Akbayan Party-list Rep. Chel Diokno atol sa nagpadayon nga impeachment trial ni Vice President Sara Duterte.
Sumala ni Joanna Caumeran sa Every Woman Philippines, nga ang maong post dili angay nga binuhatan alang sa usa ka senador ilabina nga nagsilbi matud pa kining senator-judge, ug posibleng nakalapas sa Code of Professional Responsibility and Accountability kon CPRA ug sa iyang panumpa nga maghatag og patas ug walay pinalabi nga hustisya.
Gihangyo usab sa mga niini ang Senate Ethics Committee nga imbestigahan ang insidente ug ipahamtang ang angay nga silot kon mapamatud-an ang maong paglapas. Sigon pa sa grupo, ang maong aksyon mahimong makapakunhod sa pagsalig sa publiko sa pagka-neutral sa impeachment court ug sa integridad sa Senado.
Sa pagkakaron gihulatan pa usab sa maong grupo ang kampo ni Cayetano sa paghatag og opisyal nga komento bahin sa maong reklamo.
