BUTUAN CITY – Gi-anunsyo ni Pangulong Ferdinand Marcos Jr. ang pagpatuman sa gipalapadan nga tabang pinansyal ilawom sa Unified Package for Livelihoods, Industry, Food, and Transport kon UPLIFT Assistance program dungan sa nagpadayon nga krisis sa lana ug pagtaas sa presyo sa mga palaliton.
Tumong niini nga maghatag og ayuda sa kapin 7.5 milyones ka households o gibana-banang 37.5 milyones ka Pilipino sa tibuok nasud.
Makadawat sa usa ka higayon og dugang nga tabang nga hangtod 2-mil pesos ang mga benepisyaryo sa Pantawid Pamilyang Pilipino Program kon 4Ps ug sa Walang Gutom Program.
Alang usab sa mga trabahante nga dunay ubos nga sweldo, maghatag ang gobyerno og 2-mil pesos matag-bulan gikan sa Hulyo hangtod Disyembre.
Sakop niini ang mga kwalipikadong miyembro nga gi-verify subay sa opisyal nga listahan sa Social Security System kon SSS. Sumala ni Pangulong Marcos, pangunahan sa Department of Social Welfare and Development kon DSWD ang implementasyon sa gipalapadan nga programa.
Gipaniguro usab sa administrasyon nga mugamit og mga digital nga pamaagi ang gobyerno sa pag-apod apod og kwarta sa mga pamilyang Pilpino.
