BUTUAN CITY- Nagtuo ang batikang abogado nga si Atty. Jojo Lacanilao nga posibleng pugson nga motambong si Vice President Sara Duterte sa pipila ka higayon aron motubag sa pipila ka kontrobersyal nga isyung anaa sa impeachment complaint batok niini.
Sumala ni Lacanilao, bisan paman nga igo na nag presensiya sa iyang mga abogado o representate aron mo-atobang sa korte, adunay mga higayon matud pa nga mas mapasabot mismo ni VP Sara ang konteksto sa pipila ka isyu nga gilambigit niini.
Nag-una matud pa niini ang tax record ug financial capacity sa Bise Presidente ug sa iyang pamilya.
Sigon sa abogado, posibleng pugson nga motambong si Duterte aron ipasabot kung ngadnong adunay kalahi-an ang iyang tax record ug sa iyang tinuod nga bahandi, lakip na ang bank transactions nga ming-abot og pila ka bilyon, base na usab sa unang gipakita sa House Justice Committee hearings.
Sa susamang isyu, mas masabtan matud pa sa publiko kung ang Bise Presidente mismo ang magpasabot.
Bisan paman, ang pagpugos sa Bise nga motambong, nakadepende usab gihapon matud pa sa pagpresenta sa House prosecution panel sa ilang argumento tungod dinhi usab i-base sa impeachment court ang mahimong desisyon niini.
Masaligon usab ang batikang abogado nga sa dili magdugay ipa-subpoena sa House panel ang kontrobersyal nga green box kansa gi-unoran og tax record ni VP Sara, bisan paman nga nabalik na kini sa opisina sa Bureau of Internal Revenue.
Matud ni Lacanilao, nga kanhing nagsilbing spokesperson ni Ex-Supreme Court Chief Justice Maria Lourdes Sereno niadtong gipa-ubos sa impeachment proceedings ang kanhi punong mahistrado, gipabalik lang kini sa impeachment court tungod sa kawalay ‘costudial legis’ sa korte o walay legal nga kostudiya sa maong box.
