BUTUAN CITY – Ipa-ilalom sa full alert status ang tibuok National Capital Region (NCR) sugod sa Lunes dungan sa pagsugod sa impeachment trial ni Bise Presidente Sara Duterte.
Sigon sa hepe sa National Capital Region Police Office (NCRPO) nga si PMGen. Anthony Aberin, gikan sa kasamtangang heightened alert status, usbon ug tas-an pag-usab ang ka-andam sa kapulisan human sa tulo ka adlaw nga lihok-protesta sa Iglesia ni Cristo (INC).
Base sa assessment sa NCRPO, malinwon sa kinatibuk-an ang mga pagtigum sa INC bisan pa adunay tensyon nga natala sa unang adlaw sa rally sa EDSA People Power Monument.
Wala usa’y natalang seryosong insidente o aksidente dihang gibalhin ang protesta sa Liwasang Bonifacio sa Manila.
Samtang gipadayag sa Philippine National Police (PNP) nga andam na ang tanang security preparations alang sa impeachment trial sa bise presidente.
Mu-abot sa 6,000 ka mga pulis ang i-deploy sa palibot sa Senado aron masiguro ang kalinaw ug seguridad sa pagsugod sa pagtaral.
Sumala ni PNP Public Information Office chief PCol. Allen Rae Co, gimanduan na ni PNP chief PGen. Jose Melencio Nartatez Jr. ang tanang pulis nga magpabilin nga disiplinado, walay pabor-pabor, ug nakatutok sa paghatag serbisyo sa publiko.
Gipasabot pa ni Nartatez nga ang pagtaas sa alert status kabahin sa padayon nga pagtimbang-timbang sa sitwasyon aron masiguro nga igo ang mga lakang pangseguridad samtang girespeto ang tawhanong katungod.
