BUTUAN CITY – Lima ka tawo ang namatay ug daghan pa ang nasamdan tungod sa sunog nga mi-ulbo sa usa ka 10-andana nga apartment building sa Antwerp, Belgium.
Makita ang baga nga aso nga migawas gikan sa ikawalong andana sa Linkeroever district human mi-ulbo ang kalayo pasado alas-10:00 (08:00 GMT) ning adlawa.
Makita sa video ang usa ka lalaki nga nakagawas pinaagi sa pagsaka gikan sa iyang balkonahe ngadto sa bintana sa silingan aron makalikay sa itom nga aso.
Sumala sa pulisya, kapin sa 200 ka mga tawo ang nagpuyo sa maong building ug nakit-an na ang lawas sa pipila ka biktima.
Sigon sa residente nga si Geert Dewulf, ang baga nga aso ang nakapugong kaniya paggawas sa iyang apartment rason nga nagbarikada pa sila sa sulod ug naghulat sa balkonahe hangtud nga mi-abot ang bombero nga nagluwas kanila gikan sa balkonahe human sa mga 10- minutos gamit ang ilang hagdanan.
Sigon sa mga bombero, milibot sila gikan sa usa ka apartment ngadto sa lain aron mangita og posible nga biktima kondiin dali kaayo mikatap ang aso sa tibuok building nga nakapalisod sa pag-evacuate sa mga tawo.
Usa pa ka lalaki ang nagbutyag nga ang iyang mga ginikanan lakip ang kanhi mayor sa Antwerp nga si Bob Cools, malampuson nga na-evacuate gikan sa building ug nadala sa ospital.
