BUTUAN CITY- Gipakusgan pa sa House prosecution panel ang ilang legal team human gipa-ila ang ika-duhang batch sa private prosecutors nga motabang sa pag-usig kang Vice President Sara Duterte sa nagkaduol nga impeachment trial sa Senado.
Lakip sa mga bagong private prosecutors sila Atty. Theodore Te, Atty. Reynaldo Robles, Atty. Arnold Labay ug si Atty. Mae Divinagracia.
Sumala sa House prosecution, ang upat adunay halapad nga kasinati-an sa constitutional law, criminal ug civil litigation, election law, corporate law, human rights, ug legal education. Maka-uban usab nila si Atty. Benjamin Tolosa ug ang unang grupo sa 10 ka private prosecutors sa pagpasaka og ebidensya batok sa bise presidente.
Atubangon ni Vice President Duterte ang impeachment trial kalabot sa mga alegasyon sa daw sayop nga paggamit sa P612.5 milyong confidential funds, dili katuohang pagdeklara sa iyang SALN, unexplained wealth, ug mga hulgang pamahayag batok nila President Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.
