BUTUAN CITY- Nasikop ang tulo ka mga indibidwal nga sila alias Jeff, 33, alias Roland, 34, ug si alias Nora, 45, kinsa puros mga residente sa Barangay Tagongon, Tagbina, Surigao del Sur, samtang P5.092 million nga kantidad sa mga ekipo ug materyales sa pagmina ang nasakmit sa hiniusang operasyon batok sa ilegal nga pagmina nga gipahigayon sa Police Regional Office 13 kon PRO-13, kauban ang Department of Environment and Natural Resources (DENR) ug Mines and Geosciences Bureau (MGB) Caraga, sa Sitio Kauswagan, Barangay Bahi, Barobo, Surigao del Sur niadtong Hunyo 27.
Nasakpan ang mga suspek nga aktuwal nga nagmina ug mineral nga walay angayng permit ug lisensya gikan sa DENR, hinungdan sa ilang pag-atubang og kasong paglapas sa Philippine Mining Act of 1995. Lakip sa mga nasakmit ang usa ka backhoe nga nagkantidad og P5 milyon, mga sako nga adunay gidudahang mineral nga may kalabutan sa bulawan, mga water pump, ug uban pang gamit sa pagmina.
Gipasidunggan usab ni PRO-13 Director PBGEN Marcial Mariano Magistrado IV ang malampusong koordinasyon sa mga operatiba ug mga partner agency, samtang gipasiugda ang padayon nga kampanya batok sa ilegal nga kalihokan aron mapanalipdan ang kinaiyahan ug natural nga kahinguhaan sa rehiyon.
