BUTUAN CITY – Padayon pa gihapon ang gihimong assessment sa nasudnong kagamhanan sa Venezuela sa mga damyos ingon man casualty human mi-igo ang magnitude 7.2 ug 7.5 nga linog.
Sa eksklusibong pakighinabi sa Bombo Radyo Butuan, gipadayag ni Philippine Embassy to Bogota, Colombia Vice Consul Jan Mikhail Solitario, gipadayag niini nga padayon usab ang search and rescue operations uban sa tabang sa mga rescuers gikan sa laing kanasuran gamit ang ilang mga rescue ug medical teams ingon man mga ekwepo.
Nagpabiling hagit karon ang padayong pagsira pa sa mga airport nila sa Caracas nga mao ang Simón Bolívar International Airport kansa mao ang main gateway pasulod sa Venezuela samtang sirado pa gihapon ang mga buslines ug subway tungod sa damyos sa kadalanan.
Hinuon dali rang nabalin ang linya sa kuryente ug internet rason nga kanunay ang ilang updates ug monitoring sa tanang mga overseas Filipinos nga atua sa maong nasud.
Gikumpirma usab sa opisyal nga nagpagawas na ang embahada og official advisory sa ilang mga social media accounts alang sa mga kababayang Pinoy nga atua sa Venezuela.
Apil niini ang paghangyo sa atong mga kababayan nga magpabilin sa luwas nga lugar ug dili una mugawas kung dili importante ang lakwon dayon ang pag-monitor kanunay sa mga balita ug musunod sa abiso sa kagamhanan sa Venezuela ug magbaton og kopya sa mga emergency numbers ingon man hotline sa embahada.
Nasayrang apil ang mga OFWs ang gipahikling sa kagamhanan gikan sa ilang gipuy-ang mga apartment buildings, pila ka oras human sa linog alang sa gihimong quick assessment ug gipabalik sila pagkagabii human nasutang luwas ang ilang mga gipuy-an.
Sa pagkakaron human sa linog ug hangtud sa pagkutlo niini nga balita, giklaro sa opisyal nga wala pa sila’y nadawat nga hangyo gikan sa mga OFWs nga nangayo og assistance apan gipasalig niini nga bukas ang embahada pagtunol sa bisan unsa mang kinahanglanon sa atong mga kababayan nga atua sa maong nasud.
