BUTUAN CITY- Gusto na sa House Prosecution Panel nga abrihan na ang BIR Box adiser mahuman ang pre-trial conference alang sa Impeachment case ni Vice President Sara Duterte. Subay niini, mipasaka ang Prosecution og manifestation sa Impeachment Court aron ma-abrihan kini tungod nagtuo ang kampo nga gi-unoran kini og tax record sa Bise Presidente ug sa iyang bana nga si Atty. Manases Carpio kansa adunay kalabotan sa tago ug dili masabot nga bahandi.
Sumala ni House Prosecutor Representative Leila De Lima, nga posibleng magamit nga ebidensya ang mga dokumento nga unod sa box sa Article II sa Impeachment Complaint nga adunay kalabotan sa Unexplained Wealth ni Duterte. Dugang pa ni De Lima, importante nga mabuksan na kini hilabi na nga anaa sa proseso pa sila marking of evidence aron masusi na matud pa ang mga unod niini.
Samtang na wala usab minghatag og direkta nga tubag si Defense Spokesperson Atty. Michael Poa. Sumala sa abogado pormal kining tubagon sa kampo hinungdan dili niini unhan ang mahimong tubag niini. Dili usab matud pa ma-ingon nga pugngan sa ilang kampo ang pagbukas sa Box, gani mas maayu matud pa nga huwaton nalang ang mahimong tubag sa Defense team sa nasangpit nga manifestation. Gipanghimakak usab ni Poa ang mga pangutana kung adunay connections ang isyu sa assets sa Bise Presidente sa BIR Box. Matud pa niini, lahi nga hisgutanan ang unod sa box ug assets ni Duterte niadtong kini dili pa Bise Presidente.
Sa kampo sa Clerk of Court, giklaro ni Senate Secretary Renato Bantug Jr., nga ang impeachment court lamang ang pwedeng magdesisyon kung ma-abrihan ang nasangpit nga box karung Pre-trial Conference. Sigon ni Bantug, isumite niini ang manifestation sa Prosecution sa mga Senador Judges aron mahisgutan kini ug matubag sa Impeachment Court.
Kahinumdumang unang minggawas ang BIR Box sa hearing sa kamara sa Impeachment Complaint batok kang Duterte kung asa wala kini na-abrihan tungod sa kasamtangang issue nga confidentiality sa National Internal Revenue Code.
