BUTUAN CITY – Nagpagawas og report ang United Nations nga nag-ingon nga daghan kaayo nga paglapas sa katungod sa mga batang Palestino sa Gaza ug West Bank ang nakumitar sa Israel kondiin ang uban sa mga paglapas, mahimong tawgon nga crimes against humanity, war crimes, ug genocide.
Sumala sa imbestigasyon, sukad nagsugod ang gubat tali sa Israel ug Hamas niadtong Oktubre 7, 2023, gibana-banang 30% sa mga namatay sa Gaza kansa bugti sa 20,000 nga gidaghanon.
Sigon ni United Nations Independent International Commission of Inquiry on the Occupied Palestinian Territory chairman Srinivasan Muralidhar, aduna’y mga ebidensya nga gituyo sa Israeli security forces ang pagpamatay sa mga bata, ug posible kini nga timailhan nga gusto nilang hutdon ang populasyon sa Gaza.
Gipakita usab sa report nga gigamit gihapon ang kusog nga mga bomba sa mga lugar nga daghang sibilyan resulta sa daghang bata nga nangamatay.
Mas daghan ang porsyento sa mga bata nga namatay karon kumpara sa mga nangaging gubat sa Gaza niadtong 2008 hangtud 2009 ug 2014.
Gawas sa mga namatay, nakalatid usab sa report nga grabe ang epekto sa gubat sa panglawas, pagkaon, ug mental health sa mga bata tungod sa kakulang sa tambal, pagkaon, ug kadaot sa mga ospital.
