BUTUAN CITY – Gikumpirma ni Col. Allen Rae Co sa Philippine National Police kon PNP Public Information Office nga gi-relieve na sa serbisyo ang pulis nga iyaan sa usa ka mga gunmen sa pagpamusil sa San Jose National High School sa Tacloban City kagahapon.
Sa iyang pag-atubang sa press briefing, gipadabot sa opisyal nga kinahanglan kining buhaton samtang nagpadayon ang imbestigasyon sa iyang liability sa pag-secure sa armas.
Kini human nasuta sa inisyal nga imbestigasyon nga ang 9mm pistol nga gigamit sa mas batan-ong suspek, gipanag-iyahan sa iyang iyaang na-assign sa Police Regional Office kon PRO-8.
Samtang ang usa ka armas, usa ka .38 revolver nga rehistrado sa usa ka security agency.
Gibutyag ni Col Co nga dili aksidente ang nahitabo, kay ang mga suspek nga parehong grade 9 kinsa nag-edad og 14 ug 15-anyos, nagdala og bala ug nag-reload pa sa sulod sa eskwelahan.
Gi-warningan usab sa opisyal ang tanang tag-iya sa armas nga kinahanglang responsable sa pag-secure sa ilang pusil aron malikayan nga magamit sa krimen.
