BUTUAN CITY – Mag-atubang og mga kasong kriminal ug administratibo ang siyam ka mga enforcers sa Land Transportation Office kon LTO-Caraga nga nadakpan sa gilusad nga entrapment operation kaganinang buntag sa ilang gipwestuhan sa Purok 5, Brgy. Alubihid, lungsod sa Buenavista, Agusan del Norte.
Sigon ni Allan Nobleza, team leader sa naglusad sa joint entrapment operation, gimando matud pa ni LTO chief Markus Lacanilao ang pag-entrap sa maong mga personahe human nakadawat og sumbong gikan sa mga motorista ning rehiyon sa Caraga kalabot sa pagpangilkil matud pa sa maong mga local personnel sa mga mangagi nga mga sakyanang de-karga.
Ila kining napamatud-an sa usa ka semanang gihimong imbestigasyon ug beripikasyon ug dihang nakumpirma ang ilang pagpangilkil pinaagi sa gigamit nga marked money, dinhi na gilusad ang operasyon uban sa mga sakop sa Buenavista Municipal Police Station ug sa mga personahe sa LTO Central Office.
Ila pa usab nga imbestigahan kung duna’y kasayuran kalabot sa maong modus ang regional director sa LTO-Caraga.
