BUTUAN CITY – Opisyal nang nabutang sa pwesto isip Senate President si Senador Sherwin Gatchalian atol sa special session kaganinang buntag human nakuha sa iyang grupo ang 13 ka mga senador nga maoy milangkob sa bag-o na nga majority bloc.
Tungod niini, natuldukan na ang halos usa ka buwan nga bangi sa liderato sa Senado tali sa bloc usab nila Senador Alan Peter Cayetano kinsa mi-concede nang daan sa maong posisyon.
Mi-abante na usab ang nag-ong-ong nga mga sugyot balaudnon nga na-apektuhan sa bangi sa duha ka blocs apil na ang pagtudlo sa mga heneral nga na-apektuhan sa maong sitwasyon.
Nanumpa si Gatchalian atubangan kang Senador Tito Sotto human nga wala’y mibabag sa nominasyon ni Senador Migz Zubiri kaniya.
Si Gatchalian ang ikalimang senate president ubos sa administrasyon ni Pangulong Ferdinand Marcos Jr.
Human sa iyang pagpanumpa, gipaniguro ni Gatchalian nga isip bag-ong Senate President, ang pagtutok sa mga gi-atubang nga problema sa nasud diha sa ekonomiya, padayong pagsaka sa presyo sa mga produktong petrolyo, ug nag-unang palaliton.
