BUTUAN CITY – Human sa halos 12 ka oras nga biyahe gikan sa Davao City, nadala na gyud sa evacuation center ug gymnasium sa Talacogon, Agusan del Sur ang lawas sa kanhi basketball standout ug garbo sa Agusan del Sur nga si Rene Clert Baterbonia.
Bisan pa nga naabot kini pasado ala-una sa kaadlawon, mapailubon nga naghulat sa iyang funeral convoy ang mga higala, supporters, ug mga Agsurnon aron ihatag ang ilang katapusang pagtahod uban sa mga pag-ampo ug pagpasalamat sa legacy nga iyang gibiyaan.
Nakatakda usab ang public viewing sa lawas ni Bobet nga magsugod karong ala-una sa hapon hangtod alas-12 sa tungang gabii hangtod sa iyang paglubong sa Hunyo 23.
Sa eksklusibong panayam sa Bombo Radyo Butuan, gipahayag ni Ateneo de Davao University Senior High School basketball coach Jess Evangelio, nga higala usab sa namatay nga si Rene, nga usa siya ka talagsaon nga atleta — dili lang tungod sa iyang tangkad ug abilidad sa basketball apan labi na sa iyang maayong batasan ug pagka-mapainubsanon.
Mao nga gitawag niya kini nga “one of one, walang kapareha,” tungod sa iyang kusog nga pagpaningkamot nga modaog ug pagka-humble bisan pa sa dagkong kalampusan nga iyang naangkon.
Sumala pa ni Evangelio, gikan Grade 11 hangtod Grade 12, nakita niya ang dakong determinasyon ni Rene nga dili magpatalo ug ang iyang kabut-an nga nahimong yawe sa dagkong kalampusan sa basketball. Una siyang nadiskobre sa Governors Cup sa Agusan del Sur nga nahimong dalan aron kuhaon siya sa Ateneo tungod kay nakita nila kang Rene ang missing piece sa team — usa ka manlalaro nga dili lang hilig sa basketball apan masinabtanon ug masipag usab sa pagtuon.
