BUTUAN CITY- Temporaryong gipasira sa lokal nga panggamhanan sa Dipaculao ang Hermanos Leisure and Farm Resort human sa makapasubo nga pagkalumos sa duha ka miyembro sa Ateneo Blue Eagles Men’s Basketball Team nga sila si Rene Clert Baterbonia ug Divine Adili atol sa usa ka team-building activity niadtong Hunyo 8, 2026.
Ang maong pagsira mando ni Mayor Danilo Tolentino pinaagi sa Temporary Closure Order aron tugotan ang komprehensibong imbestigasyon ug masiguro ang kaluwasan sa mga residente ug turista. Sa pagkakaron, nagpadayon ang inspeksyon sa usa ka composite inspection team nga gilangkuban sa mga representante sa BPLO, MTO, MDRRMO ug PCG.
Base sa inisyal nga findings, giingong napakyas ang resort sa pagsunod sa pipila ka importanteng safety requirements ubos sa Sangguniang Bayan Ordinance No. 2025-12 nga nagtumong sa pagpalig-on sa safety standards sa mga beach resort ug tourism establishments. Gipahayag usab sa lokal nga panggamhanan ang ilang lawom nga pahasubo sa mga pamilya ug kauban sa mga namatay samtang misaad ang mga awtoridad nga palig-onon pa ang pagpatuman sa mga lakang sa kaluwasan aron malikayan ang susamang trahedya sa umaabot.
