BUTUAN CITY – Misaad ang City Government of Butuan sa padayon nga pagsuporta sa sports development aron mas daghang batan-on ang mahasa sa ilang talento ug makarepresentar sa dakbayan sa nagkadaiyang kompetisyon.
Giluwatan kini atol sa paghatag og cash incentives sa mga Butuanong atleta ug coaches nga nakahatag og dungog sa dakbayan sa 2026 Palarong Pambansa.
Nanguna sa mga nakahatag og medalya alang sa Butuan ang mga student athletes sa Arnis nga sila Chinn-Jo Auxtero, Angela Mejias, Christel Airah Sasuman, Lyka Esplaguera, Charlagne Jaen Luna, Queen Fairy Rose Rante, ug Airielle Ashley Lape nga nakakuha og Gold, Silver ug Bronze medals sa ilang tagsa-tagsa ka kategorya.
Nakakuha usab og gold medal sa Aerobics Gymnastics si Julio Martino Torralba samtang nakahatag usab og medalya ang Wrestling, Wushu, Paragames-Bocce, Karatedo, Taekwando, Volleyball, ug Dancesport.
Sumala sa mga atleta dili sayon ang ilang gi-agian aron makadaug.
Gikinahanglan nila ang taas nga panahon para sa pag-practice, disiplina ug pagpangandam sa competition.
Daku usab ang ilang pasalamat sa suporta sa ilang mga ginikanan, coaches, ug mga kaubanang atleta aron makuha og medalya.
Ang nakuha nga kadaugan sa mga student athletes naghatag og dugang inspirasyon sa mga kabatan-onan nga dili pa ulahi ang tanan aron moapil sa sports ug mangandoy.
