BUTUAN CITY – Nagpagawas ang Department of Labor and Employment (DOLE) og mga giya sa sweldo alang ugmang adlawa Hunyo 12, Independence Day.
Sa advisory nga gipagawas niadtong Hunyo 5, giklaro sa DOLE, ang empleyado nga dili mosulod sa trabaho ugmang adlawa, adunay katungod nga makadawat sa 100% sa iyang inadlawng sweldo, basta natuman niya ang mga kondisyon sa balaod sama sa pagtrabaho o adunay bayad nga leave sa adlaw sa wala pa ang holiday.
Samtang ang empleyado nga motrabaho sa regular holiday makadawat og 200% kon doble nga sweldo sa iyang inadlaw’ng bayad alang sa unang walo ka oras nga trabaho.
Kung molapas og walo ka oras ang trabaho, kinahanglan bayran siya og dugang nga 30% sa iyang inoras nga sweldo sa maong adlaw.
Kung ang Hunyo 12 mao usab ang rest day sa empleyado apan nisulod gihapon siya sa trabaho, makadawat siya og dugang nga 30% ibabaw sa 200% holiday pay, o bugti sa 260% sa iyang adlaw’ng sweldo.
Ang overtime nga gihimo sa regular holiday nga natunong usab sa rest day bayran pa usab og dugang 30% sa hourly rate nga magamit sa maong adlaw.
Ang Proclamation No. 1006 nagdeklara sa Hunyo 12 isip regular holiday aron sa pagsaulog sa Philippine Independence Day.
