BUTUAN CITY – Mikunhod ang foreign reserves sa Pilipinas o Gross International Reserves (GIR) ngadto sa $103.937 bilyon niadtong Mayo 2026, sumala sa Bangko Sentral ng Pilipinas.
Mas ubos kini kumpara sa $104.328 bilyon sa Abril 2026 ug $105.176 bilyon sa Mayo 2025. Kini usab ang pinakagamay nga reserve sa nasod sulod sa 16 ka bulan, o sukad Enero 2025.
Ang GIR mao ang pundo sa nasod sa foreign currencies nga gigamit sa pagbayad sa mga imported nga produkto ug utang sa ubang nasod. Bisan pa sa pagkunhod, gibutyag sa BSP nga igo gihapon kini aron matubag ang mga panginahanglanon sa nasod sama sa pag-import ug pagbayad sa utang kung adunay emerhensya o krisis.
Matod sa BSP, ang pagkunhod sa GIR niadtong Mayo tungod sa pipila ka pinansyal nga kalihokan sa gobyerno ug sa Bangko Sentral. Bisan pa niini, lig-on gihapon ang kahimtang sa foreign reserves sa Pilipinas.
