BUTUAN CITY – Gitudlo sa South Korea’s Overseas Koreans Agency si South Korean singer/actress Sandara Park isip goodwill ambassador isip pag-ila sa iyang dugay nang koneksyon sa mga komunidad sa mga Koreano sa gawas sa nasod, ilabina sa Pilipinas.
Atol kini sa usa ka seremonya nga gihimo sa ilang central office sa Yeonsu-gu, Incheon, diin gitunol sa mga opisyal ang mga sulat sa pagtudlo ngadto sa mga bag-ong honorary ambassadors.
Kauban ni Park sa maong katungdanan ang iladong South Korean history educator nga si Choi Tae-seong, nga mas nailhan sa ngalan nga “Big Star Teacher.”
Gipa-ambit ni Park ang balita sa iyang social media ug nagpadayag sa iyang pagpasalamat sa higayon nga maka-alagad sa mga komunidad sa mga Koreano sa gawas sa ilang nasod.
Gipasabot sa mga opisyal sa ahensya nga ilang napili si Park tungod sa iyang talagsaong abilidad sa pagkonektar sa mga Koreano sa gawas sa nasod pinaagi sa iyang kaugalingong kasinatian sa pagpuyo sa gawas.
Ilang gihisgutan ang iyang hapit 11 ka tuig nga pagpuyo niini dinhi sa Pilipinas, diin una siyang misikat ug nakapalig-on sa iyang relasyon sa mga Korean expatriates ug mga Pilipinong fans.
