BUTUAN CITY – Tingkagol sa karsel ang usa ka olitawo human kini nasikop sa gikasang drug buybust operation pasado alas 9:39 kagabii sa P-13 Brgy. Libertad, Butuan City.
Naila ang suspetsado nga si Harvey John Pabro Toledo “Harv”, 34-anyos, walay trabaho nga residente sa P-5 Poblacion 1, Buenavista, Agusan del Norte.
Sa operasyon nga gihimo sa ginsakpan sa Butuan City Police Station-3, nakuha gikan sa posisyon sa suspek ang duha ka sachet nga dunay sulod sa gitoohang shabu nga mitimbang og 30 gramos og mibalor sa 204-mil pesos.
Lakip sa nakuha ang usa ka cellphone, usa ka single motor, pitaka og 9 ka tag-usa ka libo pesos nga kwarta diin usa niini ang tinood nga maoy gigamit isip buybust money.
Gidala sa Butuan City Police Station-3 ang na-arestong lalaki lakip na ang mga nakumpiskang butang alang sa tukmang disposasyon samtang gihikay ang kasong ipasaka batuk niini.
