BUTUAN CITY- Gipahibalo sa Ukraine nga ilang gitarget ug gipahamtangan og drone strike ang lima ka barko nga nagbiyahe sa Sea of Azov ug sa kabaybayonan sa mga teritoryong giokupar sa Russia, kansa giingong nagdala og iligal nga kargamento lakip na ang gikawat nga lugas sa Ukraine, mga military supply ug gasolina.
Ang maong operasyon nahitabo usa ka adlaw human si Ukarainian Presidente Volodymyr Zelensky mitanyag og direktang pakighinabi kang Russian President Vladimir Putin aron tapuson ang gubat, apan gisalikway kini sa lider sa Russia. Samtang nagpadayon ang tensyon, gikumpirma usab sa Ukraine nga usa sa ilang naval drone mingbuto duol sa baybayon sa Romania human matud pa minglihis tungod sa Russian electronic interference, gani walay natalang namatay apan adunay dakong kadaot sa barko ug mga bodega. Sa laing bahin, lima ka lungsoranon sa Azerbaijan ang namatay sa mga pag-atake sa duha ka barko sa Sea of Azov.
Nagpadayon usab ang mga drone attack sa duha ka kampo, diin kapin 13 ka tawo ang namatay ug sobra 70 ang na-angol sa Ukraine sulod sa miaging adlaw. Bisan pa sa panawagan ni Zelensky alang sa direktang negosasyon ug hingpit nga hunong-buto, nagpadayon gihapon si Putin sa iyang baruganan ug dayong butyag nga wala pa silay nakitang rason aron makigtagbo sa lider sa Ukraine.
