BUTUAN CITY- Opisyal nang gideklara sa Philippine Atmospheric, Geophysical and Astronomical Services Administration kon PAGASA niadtong Huwebes, Hunyo 4, nga pormal nang magsugod ang tag-ulan sa nasud.
Sumala sa state weather bureau, base kini sa ilang obserbasyon sa balik-balik nga pag-ulan sa minglabay’ng lima ka adlaw kalabot sa Southwest Monsoon o Habagat, nga nakaapekto sa pipila ka parte sa Luzon ug Visayas.
Sigon sa PAGASA nga ang pattern sa pag-ulan klaro nga indikasyon sa pagsulod sa rainy season.
Bisan paman, mipahimangno ang ahensya nga posible gihapon ang gitawag nga monsoon breaks o temporaryong paghinay sa ulan nga posibleng molungtad og pila ka adlaw o simana.
Mipasidaan usab ang PAGASA nga taliwa sa tag-ulan, possible gihapong masinati ang mas kusog nga pag-ulan tungod sa Habagat, hilabi na sa Luzon ug Visayas, tungod sa posibleng epekto sa El Niño.
