BUTUAN CITY – Igo na lang sa pagbangutan ang pamilya Cantago human nadisgrasya-patay ang ilang kabanay nga si Danny Butal Cantago Jr, 28-anyos, residente sa Purok 3 Bentahon, Esperanza, Agusan Del Sur ning mi-aging alas-5:30 sa sayong buntag.
Nasayrang padulong unta dinhi sa dakbayan sa Butuan ang biktima sakay sa iyang motorsiklo ug pag-abot niini sa national highway sa Purok 2, Barangay De Oro, ning siyudad sa Butuan, mitabok kini sa pikas lane ug didto iyang nasugatan ang de-pasayruang van nga gimanehuan ni Frederick Makinano Balite, 59-anyos, residente sa Purok 2 Barangay Mabini, Cabadbaran City, Agusan Del Norte.
Gumikan sa kakusog nga impact, nalabay ang biktima ug naka-angkon og grabeng damyos sa lawas hinungdan sa iyang kamatayon.
Gikustodiya usab sa Butuan City Police Station-4 ang driver sa van ug ang duha ka sakyanan alang sa dugang disposasyon.
