BUTUAN CITY- Gipildi sa Gilas Pilipinas U-18 Women ang Team Vietnam sa 51 big points sa FIBA U18 Women’s Asia Cup SEABA Qualifiers 2026.
Kontrolado sa PH team ang kinatibuk-ang away kung asa sa 1st quarters nahimo niining magposte og 5-point lead sa skor nga 19-14.
Pagsulod sa 2nd quarter, minghimo ang Gilas Women og 26-7 usab aron dalhon ang score sa 45-21.
Wala na nakabawi pa ang Vietnam sukad niini hangtud nga hingpit nang gitapos sa Gilas ang away sa skor nga 93-42.
Tanang Gilas player nakahimo og score sa maong away sa pagpanguna ni Tiffany Reyes nga mingkumada og 14 points sulod lang sa gamay nga panahon sa iyang pagmintinar sa hardcourt.
Si Reyes usab ang nag-una sa 2nd-quarter run sa PH team pinaagi sa impresibong opensa.
Usa ka all-around performance usab ang gihimo sa Pinay shooter nga si Rhiane Perez nga minghimo og 16 points sa kinatibuk-ang away. Mingbulsa usab kini og 7 rebounds, ug upat ka steals.
Kini ang unang away sa Pilipinas sa maong qualifier apan sa pagkakaron kwalipikado na kini sa Asia Cup proper.
