BUTUAN CITY – Gi-level up sa Agusan del Sur Police Provincial Office ang security measures nga gipatuman tungod sa Palarong Pambansa 2026 ilabina sa mga playing venues, billeting quarters ug sa main venue.
Sa eksklusibong pakighnabi sa Bombo Radyo Butuan, gibutyag ni Police Provincial Director Col Yahya Yusup nga adiser ang aktwal nga hosting sa lalawigan sa nationwide sporting event, usa ka buwan nga mas sayo na niyang gi-deploy ang ilang mga personahe aron ma-familiarize sila sa ilang trabaho ug sa lugar diin sila ipang-assign.
Sugod karong adlawa, full deployment na sa ilang pwersa ang gihimo tungod kay bisan og wala sila’y nadawat nga hulga, dili gihapon kinahanglang mukumpyansa rason nga padayon ang ilang paglibot hangtud sa gabii.
Magdepende usab ang ilang security deployment sa usa ka lugar, depende sa panginahanglan sa mga delegado ilabina sa gikatakdang pag-abot ni Pangulong Ferdinand Marcos Jr kinsa muhatag sa iyang pagpamulong.
Samtang aron masiguro ang hapsay ug malinawong hosting, nanawagan si Col Yusup sa tanang mga Caraganons nga makig-kooperar lang sa mga patakaran nga gipatuman tungod kay ang nakataya niini dili lang dungog sa Agusan del Sur kondili sa tibuok Caraga Region ingon man sa Police Regional Office-13.
