BUTUAN CITY – Nakatala ang Department of Health (DOH) og katibuk-ang 4,600 ka bag-ong kaso sa human immunodeficiency virus (HIV) sa nasud sa unang tulo ka buwan sa 2026.
Base sa pinaka-ulahing datos gikan sa HIV and AIDS Surveillance of the Philippines, miabot sa 4,633 bag-ong HIV cases ang natala gikan sa Enero hangtud Marso karung tuiga nga siyam ka porsiyentong mas taas kumpara sa parehong panahon niadtong nakalabay tuig.
Sa katibuk-ang ihap, sigon sa DOH nga 1,104 o 24 porsiyento sa mga bag-ong kaso anaa sa advanced HIV stage na sa dihang sila ma-diagnose.
Miabot sa average nga 51 ka kaso kada adlaw ang natala karung quarter. Mas ubos kini og 11 porsiyento kumpara sa 57 daily cases nga naitala sa susamang panahon niadtong 2025.
Samtang ang average monthly cases anaa sa 1,544, nga mas ubos usab og siyam ka porsiyento kumpara sa 1,693 monthly cases niadtong nakalabay nga tuig.
Pinakataas ang ihap sa mga bag-ong kaso sa National Capital Region (NCR) nga dunay 989 infections, gisundan sa Calabarzon nga dunay 808, Central Luzon nga dunay 551, Soccsksargen nga dunay 277, ug Davao Region nga dunay 263 kaso.
Sumala sa DOH, ang nasangpit nga lima ka rehiyon naglangkub sa 62 porsiyento o 2,888 sa tanang bag-ong kaso sa nasud sa nasangpit nga panahon.
Kadaghanan sa mga bag-ong kaso mga kalalakin-an diin 4,381 ang lalaki samtang 252 usab ang babaye. Ang edad sa mga bag-ong natalang kaso gikan sa 2-anyos hangtud sa 77-anyos.
Base usab sa National HIV Care Cascade niadtong Marso 2026, gibana-banang anaa sa 288-mil katawo ang nabuhi nga dunay HIV sa Pilipinas apan 55 porsiyento pa lang o 157,350 ang kumpirmadong diagnosed o laboratory-confirmed.
