BUTUAN CITY – Nagpahayag sa ilang kahadlok ang mga tawong nagpuyo dool sa sentro sa outbreak sa Ebola dungan sa pasidaan sa World Health Organization kon WHO nga posibleng mas paspas ang pagkaylap sa mga kaso kaysa sa unang gituohan.
Sigon sa usa ka lalaki sa lalawigan sa Ituri sa amihanan-sidlakang parte sa Democratic Republic of the Congo nga ang mga natakdan dali kaayong nangamatay ug daw gi-torture matud pa sila sa Ebola.
Gituohang nakapatay na ang virus og 136 ka tawo sa Congo, sumala sa mga opisyal, samtang kapin sa 514 ka kaso na ang gidudahang natala sa nasod.
Usa usab ka tawo ang namatay sa silingang Uganda.
Sumala ni Dr. Anne Ancia sa World Health Organization nga samtang nagpadayon ang imbestigasyon sa WHO sa outbreak, mas klaro ang nakita nga mikaylap na ang mga kaso ngadto sa ubang mga lugar.
Nagpakita usab nga adunay “dakong” kakulang sa pag-detect sa mga kaso rasong dili mawala ang posibilidad nga kapin na sa 1,000 ka kaso ang tinuod nga natala.
