BUTUAN CITY – Nakamugna ang mga tigduki-duki gikan sa University of the Philippines (UP) Diliman – College of Science og usa ka artificial intelligence (AI) tool nga tumong ang paspas nga pagdiskubri sa mga bag-ong antibacterial peptides nga mamahimong magsilbing alternatibong antibiotics.
Ang AI system nga gitawag nga ISCAPE (Interpretable Support Vector Classifier of Antibacterial Activity of Peptides against Escherichia coli) gimugna nila Remmer Salas, Dr. Portia Mahal Sabido, ug Dr. Ricky Nellas gikan sa Institute of Chemistry.
Sumala sa mga developer, kayang tagnaon sa ISCAPE kung ang usa ka peptide dunay kapasidad nga mopatay o mopugong sa pagdaghan sa E. coli, usa ka bacteria nga mamahimong magresulta sa food poisoning, diarrhea, ug urinary tract infections.
Imbes nga tradisyunal nga proseso nga nagkinahanglan og sunod-sunod nga laboratory testing, migamit ang sistema og Simplified Molecular Input Line-Entry System (SMILES) aron paspas nga susihon ang mga candidate molecule.
Gipasabot ni Salas nga gibansay ang AI gamit ang nagtunhay nga datos aron matumbok ang mga pattern nga aktibo ug dili aktibong peptides.
Gawas niini, gipakita usab sa ISCAPE kung unsa nga molecular features ang nagpalig-on sa bisa sa usa ka peptide, rasong mas paspas ang pagduki-duki ug nabawasan ang gastos nga trial-and-error experiments.
Bisan paman niini, gitin-aw sa mga tigduki-duki nga dili nini alisdan ang aktuwal nga laboratory testing kundi nagsilbi lang isip tabang sa mas paspas nga pag-screen sa mga posibleng candidate.
Sumala pa sa team, mamahimong i-adapt ang modelo para sa uban pang klase sa bacteria ug bioactive peptides, basta gamiton kini sa sakto ug taas nga kalidad nga dataset para sa retraining.
