BUTUAN CITY – Dili mo-ubos sa upat katawo ang kumpirmadong namatay samtang tulo ang samdan sa managlahing sunog nga miulbo sa Navotas City ug Quezon City kagahapon.
Sa Navotas, tulo ka mag-inahan ang namatay human ma-trap sa ilang balay sa L. Santos St., Manalaysay, Barangay Tangos South. Lakip sa mga biktima ang usa ka mabdos, usa ka 14-anyos nga dalagita, ug usa ka 9-anyos nga batang babaye.
Tulo ka residente usab ang gidala sa ospital human makahiagum og mga paso sa lawas sa dihang misulay sa pagbalik sa nasunog nga balay aron luwason ang ilang mga gamit.
Sumala sa Bureau of Fire Protection (BFP), nahimong lisud ang pagresponde sa mga bumbero tungod sa ho-ot nga kalsada sa lugar.
Miabot sa ikaduhang alarma ang sunog bandang alas-3:59 sa buntag ug gideklarang fire under control bandang alas-5:00 sa buntag.
Padayon nga gi-imbestigahan sa mga otoridad ang posibilidad nga nagsumikad sa jumper o ilegal nga koneksyon sa kuryente ang sunog, nga posibleng mikaylap gikan sa gisumpay-sumpay nga kuryente.
Gibana-banang 20 ka pamilya ang naapektuhan sa insidente ug temporaryong mipuyo karun sa Barangay Tangos-South Covered Court. Nagpadala usab og tabang ang lokal nga kagamhanan.
Samtang usa usab ka 15-anyos ang namatay sa laing sunog sa East Riverside, Barangay Paltok, Quezon City.
Sumala sa imbestigasyon sa Bureau of Fire Protection–Masambong Fire Station, nagsugod ang sunog bandang alas-9:40 sa buntag ug paspas nga mikaylap ang kalayu.
Wala na nakagawas ang biktima sa dakong sunog.
