BUTUAN CITY – Gipasalig sa Police Regional Office kon PRO-13 nga palig-onon pa niini precautionary measures sa umaabot nga mga operasyon aron malikayan ang susamang insidente nga dunay napatay og na-angol nga pulis sa gihimong anti-illegal drug operation ug masiguro ang kaluwasan sa mga kapulisan.
Mahinumdumang nahitabo ang insidente sa nakalabay nga gabii sa may Sitio Cayutan, Purok 2, Barangay Cagniog, Surigao City diin samtang gihimo ang buy-bust operation, nangilog og armas ang gi-arestong suspek og namusil rasong napatay si PSSg Charito J. Gepulla samtang naangol si Patrolman John Paul M. Lesmoras.
Kagahapon, personal nga gibisita ni PBGEN Marcial Mariano P. Magistrado IV, Regional Director sa Police Regional Office (PRO) 13, si Patrolman John Paul M. Lesmoras sa Caraga Regional Hospital diin gisusi niini kahimtang sa pulis ug naghatag usab og financial assistance aron makatabang sa iyang pagtambal ug pagrekober.
Mibisita usab si Magistrado IV sa haya ni PSSg Gepulla aron mohatag sa iyang kinatas-ang respeto sa kapulisan nga namatay atol sa pagserbisyo. Gipahayag usab niya ang tumang kasub-anan ug pagdasig ngadto sa pamilya sa namatay nga pulis.
Sumala sa PRO13, magpadayon ang ilang commitment nga masiguro nga mahatagan og hustisya ang pamilya ni Gepulla ug ipadayon ang suporta alang sa iyang nahibiling pamilya.
Una nang mihimo og meeting ang PRO13 Regional Director uban kang PCOL James T. Goforth, Deputy Regional Director for Operations sa PRO13, ug PCOL Warren E. Dablo, Provincial Director sa Surigao del Norte Police Provincial Office, Police Lt. Colonel Mariano Lukban, Chief of Police ug Drug Enforcement Unit personnel sa Surigao City Police Station.
Nahisgutan sa maong meeting ang angay nga operational ug legal nga aksyon human sa nahitabong buy-bust operation.
