BUTUAN CITY – Sentro sa 31st Association on Southeast Asian Nations kon ASEAN Political-Security Community Meeting kaganina sa Cebu ang pagmintina sa kalig-on ug siguridad sa Southeast Asia taliwa sa gi-atubang nga pangkalibutanong hagit.
Gihisgutan sa tigom ang pagpakusog sa collective security, pagsunod sa international law ug mas gipahugtang koodinasyon aron mamintina ang kalinaw sa rehiyon.
Sigon ni Department of Foreign Affairs Secretary Maria Theresa Lazaro, importanteng magkahi-usa ang ASEAN taliwa sa tensyon sa Middle East, hulga sa cyber security, trans-national ug mga isyu sa maritime security.
Giklaro usab niya ang implementasyon sa ASEAN community vision 2045 ug ang sugyot alang sa kamugnaan sa ASEAN maritime center dinhi sa Pilipinas aron mapakusgan ang operasyong pandagat sa rehiyon.
Gi-awhag usab ni Lazaro ang pagpakusog pa sa information-sharing, capacity building ug kooperasyon batuk sa nagtubo nga mga hulga lakip na ang paggamit sa artificial intelligence kon AI batuk sa kriminalidad tungod sa na-usab nga geo-political landscape.
