BUTUAN CITY – Nakabsan sa kinabuhi samtang anaa sa hospital ang usa ka pulis samtang angol usab ang kauban niini nga police usab sa natigayong pagpamusil sa suspek nga nakailog og armas sa dihang gihimo ang drug buy-bust operation sa Sitio Cayutan, Purok 2, Barangay Cagniog, Surigao City pasado alas 10:30 kagabie.
Sa impormasyong nakuha ning sibyahan, nailhan ang namatay nga si PSSG Charito J. Gepulla, 38 anyos nga residente sa Barangay Magallanes, Claver, Surigao Del Norte samtang ang angol mao si Pat John Paul M. Lesmoras, 26 anyos nga residente sa Lenentian, Cantilan, Surigao del Sur.
Subay sa taho, gihimo ang anti-illegal drugs operation batok sa suspek nga nailang si Alyas Ronron Maturan.
Imbes nahuman na matud pa ang transaction og giposasan na ang suspek, nakahimo matud pa kini pag-ilog sa armas ni Gepulla og namusil.
Naigo sa tuong bahin sa tiyan ang biktima samtang sa pagsulay nga dakpon ang suspek, napusilan usab si Pat Lesmoras, nga naigo sa wala nga tuhod ug tuo nga bukton.
Gidala ang mga biktima sa Caraga Regional Hospital apan pag-abot sa alas 12:00 sa tungang gabii, gideklarang patay na si Gepulla sa attending physician nga si Dr. Paolo Tatad.
Padayon karun ang manhunt operation sa kapulisan batok sa maong suspek.
