BUTUAN CITY- Gi-akusaran ni Ukrainian Presidente Volodymyr Zelensky ang Russia nga nakalapas sa unilateral ceasefire nga gi-anunsyo sa Ukraine pinaagi sa drone ug missile attacks sa daghang siyudad, lakip na ang pag-igo sa usa ka kindergarten sa Sumy nga nakapatay og usa ka babaye. Ang duha ka kampo sa gubat nag-anunsyo og tagsa-tagsa ka ceasefire nga walay klarong kasabutan. Sigon pa ni Zelensky, nga ang aksyon sa Russia usa ka “klarong paglapas sa kalinaw.”
Niadtong Martes, 27 ka tawo ang namatay sa tibuok Ukraine tungod sa mga pag-atake, samtang ang Foreign Minister sa Ukraine nagpasidaan nga ang panawagan sa Russia alang sa truce usa ka “peke” ug mas gitagad usab ni Russian President Vladimir Putin ang military parade kompara sa kinabuhi sa mga tawo.
Samtang nagpadayon ang tensiyon, naghulga ang Moscow og “massive missile strike” sa Kyiv kon molapas ang Ukraine sa unilateral truce sa Mayo 8 ngadt sa Mayo 9.
