BUTUAN CITY – Mukabat sa 700 ka mga pulis nga magsilbing security personnel ang gipadala na sa Police Regional Office kon PRO-13 ngadto sa Agusan del Sur aron maoy magsiguro sa luwas, malinawon, hapsay ug malampusong Palarong Pambansa 2026 nga himuon sa Mayo 24 hangtud 31.
Sigon ni PRO-13 spokesperson PMajor Jennifer Ometer, ang gipang-deploy nga mga personahe gilangkuban sa tag-50 gikan sa Agusan del Norte Police Provincial Office (PPO), Surigao del Norte ug Surigao del Sur PPO, 30 gikan Butuan City Police Office, ug 120 usab gikan sa Regional Mobile Force Battalion 13.
Kini gawas pa sa 400 personahe nga mupa-ilalom unta sa Basic Internal Security Operations Course (BISOC) training apan magsilbi unang augmentation force aron masiguro nga masustiner ang operational readiness.
Aron masuportahan ang usa ka multi-layered ug responsive nga security framework, nag-deploy usab og mga specialized units ug equipment apil na ang duha ka tactical teams nga duna’y duha ka Triton vehicles, usa ka medical team nga duna’y ambulance, usa ka Explosive Ordnance Disposal team nga dunay sakyanan, usa ka engineering support team nga duna’y equipment ug duha ka SWAT teams gikan sa Butuan City Police Office.
