BUTUAN CITY – Duna’y mga adunahang Lebanese nga mikagiw sa Kinshasa sa Democratic Republic of Congo dala ang ilang pamilya aron makalikay sa giyera nga gilusad sa Israeli forces batuk sa mga Hezbollah targets subay sa padayong pagkaylap sa giyera sa Middle East.
Sa eksklusibong pakighinabi sa Bombo Radyo Butuan, gipadayag ni Bombo international correspondent to Congo Gerry Ruiz, sushi chef sa usa ka sikat nga restaurant sa Kinshasa, nga sukwahi sa mi-aging mga semana dihang kusog pa ang paggiyera sa Amerika ug Israel sa Iran kondiin menos usab ang mga shipping nga mangabot sa maong nasud, karon inanay na kining mibalik sa normal.
Partikular niini ang mga pagkaong ila pang kumprahon gikan sa Lebanon ilabina kadtong mga pagkaong kasagari nilang idalit sa mga langyaw’ng turista.
Bisan pa man sa global fuel crisis, dili apektado ang presyo sa ilang mga produktong petrolyo tungod kay ang presyo sa mi-aging tuig, mao ra gihapon hangtud karon apil na ang mga nag-unang palaliton.
Alayon niini, wala matud pa’y angayang kabalak-an ang mga ania sa nasud nga duna’y kabanay nga nagtrabaho sa Congo tungod kay dili man sila apektado sa kagubot sa Middle East.
