BUTUAN CITY – Muabot sa 14 ka barangay ang apektado sa dili maayong suplay sa tubig sa Butuan City nga hatud sa taas nga huwaw o ka-init sa panahon.
Kini ang gikumpirma ni Ramil Barquin, tigpamaba sa Butuan City Water District kon BCWD sa eksklusibong pakighinabi ning sibyahan.
Sigon ni Barquin nga nahubas ang Taguibo River rasong mikunhod pag-ayo ang volume sa suplay sa tubig diin ang apektadong mga barangay anaa sa kasadpang bahin sama sa Barangay Ambago, Bancasi, Bit-os, San Vicente og Masao.
Tungod niini, nagtagbo ang kadumalahan sa BCWD, ang TASC, Liga ng mga Barangay og Butuan City Government aron hisgutan ang buhaton aron mapagaan ang palas-onon sa mga kunsumador.
Lakip sa gihimo niini ang pagrasyon sa tubig apan dili balay-balay kundi kada barangay duna lay lugar diin didto mokuha og tubig.
Gi-implementar usab ang Oplan Sag-ob diin ang dunay mga sakyanan og maka-adto sa Pump station 1 pwede magsag-ob.
Gawas niini gi-awhag usab ang pagpa-activate sa mga deep well.
Apan nahisgutan ni Barquin nga kung pamati sa kunsumador alkanse gyud siya sa minimum nga bayad, pwede matud pang ipa-putol temporaryo ang linya sa tubig og ibalik ra kung mabalik na usab ang stable nga suplay sa tubig.
Sa hisgutanang long term nga plano, gibutyag ni Barquin ang pagpa-improve sa mga tubo nga anaa sa Magsaysay Bridge aron dili na matook ang tubig gikan sa TASC ngadto sa kasadpang bahin.
Sumala pa niini, plano pa kini tungod kay wala pay disesyun sa kakuhaan sa pondo diin mo-loan ba ang BCWD o motabang sa paggasto ang City Government.
Samtang sa kabahinan sa TASC, gitun-an usab nila karun ang pagpangeta og laing sources sa tubig gawas sa Taguibo River.
