BUTUAN CITY – Naputos sa pagpasalamat ang usa ka pari tungod kay nahibalik kaniya ang iyang mga gamit nga nahulog samtang siya pauli na sa Tagum City sakay sa usa ka single motor.
Sigon sa pari nga si Fr. Rey Amora, nga gikan siya sa pantalan sa Nasipit, Agusan Del Norte kansa gikan usab sa Bohol, og pauli na sa dihang nabantayan niya ang iyang bag nga na-abli sa pagsulod na niini sa Agusan del Sur og nangahulog ang gamit.
Mibalik siya sa iyang agi tungod kay importante man kaayu ang mga nahulog sama sa mga IDs.
Miabot siya sa lungsod sa Nasipit sa dihang dunay mensahe gikan sa Bombo Radyo nga giuli dinhe ning sibyahan ang iyang mga gamit.
Una nang miabot sa Bombo Radyo ang duha ka indibidwal aron iuli ang napunitan nilang mga gamit lakip na ang 4-mil pesos nga kwarta.
Saysay pa ni Robert Iligan, gikan sila sa Cagayan de Oro naghatud og kahoy ug pauli na sa dihang mi-relax sila sa rotunda sa Bancasi. Nakit-an matud pa nila nga nanglupad ang mga gamit gikan sa bag sa motorista nga kusog ang dagan.
Gipamunit nila kini og walay pagduha-duha nga gibitbit dinhe sa Bombo radyo aron mabalik usab sa tag-iya.
Sumala pa niini nga wala siya nagduha-duha sa pag-uli sa mga gamit tungod kay dili lalim kung mawad-an og gamit.
