BUTUAN CITY – Gipangayu ni kanhe House Speaker Ferdinand Martin Romualdez nga mag-inhibit ang Office of the Ombudsman sa imbestigasyon batuk kaniya may kalabutan sa matud pa kontrobersya sa flood control projects tungod kay dunay “pattern of prejudgment” nga misupak sa due process.
Sa upat ka palid nga sulat nga dunay petsang Abril 22, 2026, gipamugos sa iyang mga abogado gikan sa Villaraza & Angangco nga ang mga pamahayag ni Ombudsman Jesus Crispin Remulla ug pipila ka opisyal niini nagpakita nga daw nadesisyunan na ang pagpasaka og kasong plunder og wala pay pormal nga reklamo o preliminary investigation.
Gibutyag pa sa kampo ni Romualdez nga nagsugod pa niadtong Nobyembre 2025 ang matud pa bias sa dihang gibutyag ni Remulla nga gitun-an na sa iyang buhatan ang kaso ug posibleng dunay plunder charges.
Sa Abril 2026, migawas pa ang mga pamahayag nga seryosong giandam ang kaso, nga sumala sa depensa indikasyon sa sayung pagmugna og prosecution theory.
Gitumbok usab sa mga abogado ang press conference diin gitawag ni Assistant Ombudsman Mico Clavano si Romualdez nga “master plunderer,” butang nga mas nagpakita sa pagpabor.
Pamugos sa depensa, naghatag kini og impresyon nga ang imbestigasyon mahimong “mere formality”.
Tungod niini, nanawagan si Romualdez nga ang bisan unsang reklamo kuptan sa usa ka neutral ug independent-minded nga opisyal aron maseguro ang patas nga proseso ug mapabilin ang pagsalig sa publiko sa sistemang panghustisya.
