BUTUAN CITY – Nadugangan pa ang mga petisyong giduso sa Korte Suprema aron kuwestiyunon ang impeachment proceedings batuk kang Vice President Sara Duterte sa House of Representatives.
Kini na ang ikaupat ka petisyon mahitungod sa nagpadayon nga impeachment proceedings batuk sa Bise Presidente.
Ang unang tulo ka petisyon bulag nga giduso ni VP Sara mismo, grupo sa mga abogado ug uban pang grupo nga gilangkuban usab sa mga abogado ug mga pribadong katawhan.
Sa 34 ka palid nga petisyon nila Hue Jyro Go, Micah De Guzman, ug Jake Leoncini, gihangyu nila ang Temporary Restraining Order (TRO) o injunction aron ipahunong ang paghisgut sa ika-3 ug ika-4 nga impeachment complaints lakip na ang pag-isyu sa subpoena.
Gipamugos sa mga petitioner nga iligal matud pa ang sunod-sunod nga subpoena ug pagpangaylap og ebidensiya nga wala sa reklamo, nga gitawag nilang “fishing expedition,” ug paglapas sa Konstitusyon ug Impeachment Rules.
Gikuwestiyon usab nila ang halapad nga pagpangayu og State of Assets, Liabilities and Net Worth (SALN) nga wala matud pay direktang kalambigitan sa mga alegasyon.
Sumala pa sa petitioners, dunay kakulang sa “fair play” tungod sa bias ang pipila ka magbabalaod nga makonsiderang grave abuse of discretion.
Gitahasan usab sa Korte Suprema ang Kamara ug House Committee on Justice nga magsubmite og komento.
